महान् फुटबलर लियोनेल मेसीले अन्तर्राष्ट्रिय खेलजीवनबाट सन्यासको घोषणा गरेका छन् । ‘यस्तो निर्णय गर्दा पीडा हुन्छ, अहिले मनदेखि नै आहत भएको छु तर मलाई थाहा छ, सन्यासको समय आएको छ’– ३९ वर्षीय मेसीले आफ्नो इन्स्टाग्राममा लेखेका छन् । मेसीले दुई दशक अर्जेन्टिनाको राष्ट्रिय टिमको प्रतिनिधित्व गरेपछि सन्यास घोषणा गरेका हुन् ।
मेसीले विश्वकप फाइनल हारेको दुई दिनपछि नै सन्यासको पत्र लेखेको खुलासा गरेका छन् । उनका अनुसार बुबा जर्ज मेसी बिरामी भएकाले सन्यासको घोषणा केही पर सरेको हो । मेसीका बुबा जर्जको अगस्ट ८ मा निधन भएको थियो । मेसीले व्यावसायिक फुटबललाई भने निरन्तरता दिनेछन् । अहिले उनी अमेरिकाको क्लब इन्टर मियामीमा आबद्ध छन् ।
सन् २०२२ मा कतारमा भएको विश्वकप अर्जेन्टिनाले मेसीकै कप्तानीमा जितेको थियो । सन् २००६ मा अन्तर्राष्ट्रिय फुटबलमा पर्दापण गर्ने मेसीले विश्व फुटबलको सबभन्दा ठुलो ट्रफी जित्न १६ वर्ष कुर्नु परेको थियो ।
सो विश्वकपमा मेसीले प्रतियोगिताका सर्वश्रेष्ठ खेलाडीलाई दिइने गोल्डेन बल प्राप्त गरेका थिए ।सन् २०२६ को विश्वकपमा भने अर्जेन्टिना फाइनलमा स्पेनसँग अतिरिक्त समयमा पराजित भयो । भर्खरै सम्पन्न विश्वकपमा मेसीले आठ खेलमा आठ गोल गरेका थिए । उनी दुई गोलले मात्र गोल्डेन बुट जित्नबाट बञ्चित भए । मेसीले अर्जेन्टिनाको जर्सीमा १२५ गोल गरेका छन् । विश्वकपमा मात्र उनले २१ गोल गरे ।
दश वर्षअघि कोपा अमेरिकाको फाइनलमा चिलीसँग हारेपछि मेसीले आवेगमा अन्तर्राष्ट्रिय फुटबलबाट सन्यास लिने घोषणा गरेका थिए । किनभने मेसीले त्यसबेलासम्म अर्जेन्टिनालाई एउटा पनि प्रमुख उपाधि दिलाउन ससेका थिएनन् । मेसीले लिएको सन्यासको निर्णयले विश्व फुटबलमै ठुलो हलचल मच्चायो । त्यसपछि सर्वत्र मेसीको सो निर्णय फर्काउने अभियान चलेको थियो । समर्थकहरूको मायाले मेसीलाई पगाल्न पनि सफल भयो । मेसीले सन्यास फिर्ता लिएर अर्जेन्टिनालाई सन् २०२१ र २०२४ मा कोपा अमेरिकाका साथै चार वर्षअघि विश्वकप फुटबलको उपाधि पनि दिलाए ।
डेब्युदेखि सर्वकालीन महान्सम्मको यात्रा
मेसीले सन् २००५ मा हंगेरीविरुद्धको मैत्रीपूर्ण खेलमा वैकल्पिक खेलाडीका रूपमा ६३औँ मिनेटमा मैदान प्रवेश गर्दै अर्जेन्टिनाका लागि डेब्यु गरेका थिए। तर, मैदान छिरेको एक मिनेटभित्रै हातको कुहिनाले विपक्षी खेलाडी भिल्मोस भान्जाकलाई लागेपछि उनले सीधै रातो कार्डको सामना गर्नु परेको थियो।
अन्तर्राष्ट्रिय मञ्चमा कठिन सुरुआतका बाबजुद मेसी विश्व फुटबलकै सर्वकालीन महान् खेलाडीका रूपमा स्थापित भए । उनले अर्जेन्टिनालाई एक विश्वकप र दुई पटक ‘कोपा अमेरिका’को उपाधि दिलाए।
विश्वकपको इतिहासमा २१ गोलसहित उनी फ्रान्सका किलियन एम्बाप्पे (२२ गोल) पछि सर्वाधिक गोल गर्ने खेलाडीको सूचीमा दोस्रो स्थानमा छन्। त्यस्तै, समग्र अन्तर्राष्ट्रिय फुटबलमा १२५ गोलसहित उनी आफ्ना समकालीन प्रतिद्वन्द्वी पोर्चुगलका क्रिस्टियानो रोनाल्डो (१४६ गोल) पछि दोस्रो स्थानमा रहेका छन् ।
