झापा । भद्रपुर झापा गोल्डकपले भद्रपुरका कीर्तिमानी साइकलयात्रीहरुलाई सम्मान गरेको छ ।
मेचीदेखि महाकाली र महाकालीदेखि मेचीसम्मको कीर्तिमानी साइकल यात्रा सफलतापूर्वक सम्पन्न गर्ने भद्रपुर साइकल समाजका अध्यक्ष, भद्रपुर नगरपालिकाका निवर्तमान नगरप्रमुख, भद्रपुर झापा गोल्डकपका महासचिव जीवनकुमार श्रेष्ठसहित पाँचजनालाई आज एक विशेष समारोहका बीच सम्मान गरिएको हो ।
साइकल यात्रीहरुले कात्तिक २३ गते भद्रपुरको मेची पूलबाट प्रारम्भ गरेको यात्रा मंसिर १ गते ९ दिनमा महाकालीको गड्डाचौकी पुगेर एकतर्फी समापन गरी पुनः मंसिर ३ गतेबाट यात्रा प्रारम्भ गरी ६ दिनमै मेची किनारमा आएर यात्रा सम्पन्न गर्दै कीर्तिमान रमखेका थिए ।
गोल्डकपका अध्यक्ष दिपेश ढकालको अध्यक्षतामा भद्रपुरस्थित एयरपोर्ट होटलमा आयोजित समारोहमा साइकलयात्रीहरु जीवनकुमार श्रेष्ठ, देबीबहादुर श्रेष्ठ, मनोज सिंह, समिर पोखरेल र विश्वचन्द्र महतोलाई प्रमुख अतिथि भद्रपुर नगरपालिकाका प्रमुख गणेश पोखरेल, उपप्रमुख राधा कार्की, वडाध्यक्षहरु हंशधर राजवंशी, बन्धु कार्की, गौरब सुब्बालगायतले सम्मानपत्र प्रदान गेका थिए ।
त्यसैगरी, संस्थागत रुपमा भद्रपुर साइकल समाजलाई नगद २५ हजारसहित सम्मानपत्र प्रदान गरिएको थियो ।
स्वागत मन्तव्य तथा कार्यक्रमको औचित्य प्रस्तुत गर्दै अध्यक्ष ढकालले मेची–महाकाली दोहोरो साइकल यात्राले भद्रपुरको प्रतिष्ठा बढाएको मात्र नभई खेल पर्यटन र स्वस्थ जीवनशैलीप्रति समाजलाई प्रेरित पनि गरेको बताए । प्रमुख अतिथि नगरप्रमुख पोखरेल र उपप्रमुख राधा कार्कीले शुभकामना मन्तव्य राख्दै साइकल यात्राले भद्रपुरको पहिचान बढाएकोमा खुशी व्यक्त गर्दै भद्रपुर साइकल समाजको अभियानमा नगरपालिकाले सधैँ सहयोग गर्ने बताए ।
यसैगरी, भरखरै मनास्लु पदमार्गको कठिन यात्रा सम्पन्न गरी फर्किएका वडा नं ८ का वडाध्यक्ष गौरव सुब्बा ‘मनोज’ले आफ्नो यात्रा अनुभव प्रस्तुत गर्दै साइकल यात्रीलाई शुभकामना दिएका थिए । सम्मानित व्यक्तित्व साइकल समाजका ध्यक्ष श्रेष्ठले आफ्नो अनुभव सुनाउँदै यात्राले आफूहरूलाई देश, प्रकृति र मानवीय क्षमताप्रतिको भरोसा अझै मजबुत बनाएको बताए । कार्यक्रमको सञ्चालन गोल्ड कपका सचिव तीर्थराज ढकालले गरेका थिए ।
