झापा । झापाको बिर्तामोडमा मुख्य कार्यालय रहेको शिक्षा बहुउद्देश्यीय सहकारी संस्थाको एघारौं साधारण सभा अन्तरगत इकाईगत साधारणसभा आजदेखि शुरु भएको छ ।
पाँच वटा सेवा केन्द्र रहेको संस्थाको सदस्य सेवा केन्द्र शनिश्चरेबाट इकार्इगत साधारणसभा शुरु भएको हो । संस्थाका अध्यक्ष सुब्रत न्यौपानेको अध्यक्षातामा भएको कार्यक्रमको प्रमुख अतिथि अर्जुनधारा नगरपालिकाकी उपप्रमुख खड्गमाया पराजुली थिइन् ।
साधारण सभाको उद्घाटन पश्चात शुभकामना मन्तव्य राख्दै प्रमुख अतिथि पराजुलीले सहकारी संस्थाप्रति सदस्यले अपन्त्व ग्रहण गर्नुपर्नेमा जोड दिइन् । उनले धेरै सहकारी संस्था समस्यामा रहेको बताउँदै आफ्नो नगरपालिकामा पनि धेरै उजुरी आउन थालेको बताइन् । उनले शिक्षा सहकारीको प्रतिवेदन अध्ययनका क्रममा संस्थाको कोषको अवस्था राम्रो रहेको बताइन् ।
कार्यक्रममा सदस्य सेवा केन्द्र शनिश्चरे अन्तरगत तीन जना सदस्यलाई सम्मान गरियो। आवधिक बचततर्फ भरत धिमाल, शिक्षातर्फ त्रिमेश दाहाल र उत्कृष्ट ऋणीतर्फ लक्ष्मी तामाङलाई सम्मान गरियो ।
कार्यक्रममा संस्थाका अध्यक्ष न्यौपानेले अध्यक्षको प्रतिवेदन प्रस्तुत गर्दै संस्थाको समग्र अवस्थाका बारेमा जानकारी दिए। उनले शिक्षाले सदस्य केन्द्रित धेरै सुविधा र योजना ल्याएकाले लाभ लिन सदस्यलाई आग्रह गरे ।
त्यस्तै, संस्थाका लेखा समिति संयोजक युवराज निरौलाले लेखा समितिको प्रतिवेदन प्रस्तुत गर्दै संस्थाको कोष क्रमशः बृद्धि हुँदै गएको जानकारी दिए । आर्थिक वर्ष २०७९÷०८० मा संस्थाको कोष एक करोड ९८ लाख ९४ हजार २२६ रुपैयाँ पुगेको जानकारी दिँदै उनले गत आवमा संस्थाको शेयर पूँजी ३ करोड ४८ लाख ८१ हजार र बचत संकलन १६ करोड ८४ लाख ७ हजार १५८ रुपैयाँ रहेको बताए ।
कार्यक्रममा ऋण उपसमितिको तर्फबाट प्रतिवेदन प्रस्तुत गर्दै उपसमिति संयोजक एवम् संस्थाका उपाध्यक्ष हेमराज मिश्रले आर्थिक वर्ष २०७९÷०८० मा संस्थाको कूल ऋण २९ करोड ५६ लाख ६२ हजार रहेको र कर्जा असुली ११ करोड ४५ लाख ६१ हजार ८११ रुपैयाँ रहेको जानकारी दिए ।
त्यस्तै, संस्थाको लगानीमा रहेको रकम १८ करोड ९ लाख १९० रुपैयाँ रहेको छ भने ऋणबाट ३ करोड ५३ लाख ४१ हजार ३३९ रुपैयाँ आम्दानी भएको छ । संस्थामा हाल चार हजार ७२० जना शेयर सदस्य छन् भने ३३ जना कर्मचारी रहेका छन् ।
मुख्य कार्यालय बिर्तामोडसहित शनिश्चरे, धाइजन, धुलाबारी, चैतुबारी र दुर्गापुर सदस्य सेवा केन्द्रमार्फत् सेवा प्रदान गर्दै आएको छ ।
संस्थाका सचिव सूर्यकुमार खतिवडाले सञ्चालन गरेको कार्यक्रममा स्वागत उपाध्यक्ष हेमराज मिश्रले गरेका थिए । कार्यक्रममा संस्थाका सञ्चालक समिति सदस्य उमा राई, लक्ष्मीप्रसाद घिमिरे,, लेखा समिति सदस्य यामनाथ खरेल, लक्ष्मी देवानलगायतको उपस्थिति थियो ।
