झापा । नेपालमा पहिलोपटक र सबैभन्दा ठूलो विद्यार्थी ट्यालेन्ट हन्ट प्रतियोगिता ‘स्टुडेन्ट अफ द इयर नेपाल २०२५’ हुने भएको छ ।
आयोजक स्टुडेन्ट अफ द इयर नेपाल राष्ट्रिय समितिका अनुसार यो विद्यार्थी ट्यालेन्ट हन्ट प्रतियोगितामा १३ वर्षदेखि २१ वर्ष समूह (कक्षा ८ देखि १२ सम्म अध्ययनरत विद्यार्थी)–ले सहभागिता जनाउन पाउनेछन् ।
यो प्रतियोगिताको पहिलो अडिसन झापाको विर्तामोडमा आगामी मंसिर ६ गते स्थानीय लिटल फ्लावर्स इङलिश स्कूलमा हुने कार्यक्रमका निर्णायक युवा वैज्ञानिक आरिफ अलिले जानकारी दिएका छन् । बिर्तामोडपछि धरान, विराटनगर, जनकपुर, चितवन, पोखरा, बुटवल, धनगढी, ललितपुर, भक्तपुर र काठमाडौँमा अडिसन हुनेछ । त्यसको तालिका सार्वजनिक भइसकेको उनले बताए ।
प्रतियोगीहरूले दर्ता शुल्कवापत ९९९ रुपैयाँ बुझाउनुपर्नेछ । त्यसबाहेक अन्य कुनै शुल्क नलाग्ने बताइएको छ । देशभरिका अडिसनबाट पहिलो चरणमा २०० प्रतियोगी छनोट गरी काठमाडौँमा दोस्रो चरणमा ४० जना र तेस्रो चरणमा १० प्रतियोगी छनोट हुने र विजेता घोषणा हुने आयोजकले जनाएको छ । यो कार्यक्रम हिमालय टिभी र ओसीआर रियालिटीबाट प्रत्यक्ष प्रशारण हुनेछ ।
‘यो कार्यक्रमको मुख्य उद्देश्य नेपालभरिका विद्यार्थीमा लुकेका प्रतिभा खोजी गर्नु, तिनीहरूलाई राष्ट्रियस्तरमा परिचित गराउनु र उनीहरूको आत्मविश्वास तथा सिर्जनात्मक क्षमतालाई उजागर गर्नु हो’ अलिले भने ।
स्टुडेन्ट अफ द इयरका क्रिएटिभ हेड इमरान अलिले यो प्रतियोगिता प्रतिस्पर्धा मात्र नभएर नेपाली विद्यार्थीहरूको सम्भावनालाई विश्वसामु देखाउने एउटा राष्ट्रिय अभियान रहेको बताए । अनुमानित एक करोड रुपैयाँ खर्च हुने यस प्रतियोगिताको विजेताले नगद ५ लाखसहित ट्रफी र ५ लाख बराबरको छात्रवृत्तिसहित विभिन्न गिफ्ट ह्याम्पर प्राप्त गर्ने उनले बताए ।
स्टुडेन्ट अफ द इयरका निर्माता दिव्य सापकोटाले विद्यार्थीहरूले एउटै मञ्चमा आफ्नो बहुम’खी प्रतिभा देखाउने अवसर प्राप्त गर्ने बताए । उनले यो प्रतियोगिता नेपालमै पहिलो पटक आयोजना गर्न लागिएको उनले बताए । उनका अनुसार प्रतियोगितामा मोटिभेशनल स्पिकर तथा पूर्व बैंकर अनिल केशरी साह, अभिनेत्री प्रियङ्का कार्की र युवा वैज्ञानिक आरिफ अलि निर्णायकमा रहनेछन् । कार्यक्रम सञ्चालिका लोकप्रिय टिकटकर तथा फेसन मोडेल इभा गिरीले गर्नेछिन् ।
कार्यक्रम संयोजक आश्विन तिम्सिनाले प्रतियोगितालाई सफल बनाउन प्याब्सन र नेपाल जेसीजले देशभरबाट सहयोग गर्ने प्रतिबद्धता जनाएको बताए ।
