सौम्य शर्मा
विर्तामोड । झापाको प्रमुख व्यापारिक केन्द्र विर्तामोडमा दुई अर्बभन्दा बढी लगानीमा नेपालकै ठुलो चेन सुपरस्टोर ‘भाटभटेनी’ आजदेखि औपचारिक रुपमा सञ्चालनमा आएको छ ।
आज बिहान ६ः३० बजेको शुभसाइतमा भाटभटेनी सुपर स्टोर प्रा.लि.का अध्यक्ष मीनबहादुर गुरुङले ब्राह्मणबाट शुभसाइत गराएर स्टोरको उद्घाटन गरे । नेवारी सांस्कृतिक बाजागाजासहित उत्तम साइतमा गुरुङले स्टोरको उद्घाटन गरेका थिए । बिहान उद्घाटनसँगै आज बिहान ९ बजेपछि उपभोक्ताका लागि स्टोर खुला गरिएको छ ।
भाटभटेनीले आफ्नो २६औँ शाखा झापामा सञ्चालनमा ल्याएको हो । विर्तामोडको भगवानचोकमा स्टोर सञ्चालनमा आएको हो ।
बिर्तामोडमा रहेको स्टोर करिब २ लाख ५० हजार स्क्वायर फुट सपिङ स्पेससहित १५ कठ्ठा क्षेत्रफलमा फैलिएको छ । झापामा २ अर्ब रुपैयाँभन्दा बढी लगानी रहेको यो पहिलो व्यावसायिक प्रतिष्ठान हो ।
स्वदेशी तथा बिदेशी ब्रान्डका उच्च गुणस्तरका सामानहरु पाइने सुपर स्टोरमा झापा जिल्लासहित आसपासका छिमेकी जिल्ला तथा छिमेकी मुलुक भारतका सीमावर्ती सहरबाट समेत ग्राहकहरु किनमेलका लागि आउने विश्वास रहेको अध्यक्ष गुरुङको भनाइ छ ।
उपभोक्तालाई बजार मूल्यभन्दा सस्तो एवम् गुणस्तरीय सामग्री एकै ठाउँबाट उपलब्ध गराइने भएकोले भाटभटेनी यस क्षेत्रका उपभोक्ताको सपिङका लागि पहिलो रोजाइ बन्ने क्षेत्रीय भाटभटेनीका व्यवस्थापक विनोद भट्टराईले बताए ।
उद्घाटनका आवसरमा ग्राहकलाई इलेक्ट्रोनिक्स सामग्रीमा २० प्रतिशत र अन्य सामानको खरिदमा १० प्रतिशतसम्म छुटको व्यवस्था गरिएको छ ।
स्टोरमा ग्रोसरी, किचनवेयर, रेडिमेड गार्मेन्ट, फुटवेयर, इलेक्ट्रोनिक्स, ब्रान्डेड गार्मेन्ट, ब्रान्डेड फुटवेर, फुडकोर्ट, मल्टिप्लेक्स सिनेमा हल तथा बालबलिकाका लागि किड्सजोन तथा स्केट पार्क लगायतका सुविधाहरु रहेको भाटभटेनीले जनाएको छ ।
