भद्रपुर । जेठ तेस्रो साता झापाको भद्रपुरमा सम्पन्न नगर युवा सम्मेलनको घोषणापत्र शनिबार सार्वजनिक गरिएको छ ।
अन्तर्राष्ट्रिय युवा दिवसको अवसर पारेर नगर युवा परिषद्द्वारा शनिबार नगरपालिकाको सभाहलमा आयोजित एक समारोहका बीच घोषणापत्र सार्वजनिक गरेको हो ।
समारोहका अध्यक्ष भद्रपुर नगरपालिकाका प्रमुख तथा नगर युवा परिषद्का अध्यक्ष गणेश पोखरेल, उपप्रमुख राधा कार्की, ७ नं वडाध्यक्ष अभिषेक ढुंगाना, कार्यपालिका सदस्य सीता गुरागाईं तथा नगर युवा परिषद्का कार्यकारी उपाध्यक्ष सरोज ढकालले संयुक्त रुपमा घोषणापत्र सार्वजनिक गरेका थिए ।
परिषद्का सदस्य सचिव योगेन्द्र ढुंगानाले सञ्चालन गरेको समारोहका बीच सार्वजनिक गरिएको घोषणापत्रमा भनिएको छ—
प्रस्तावना ः वन–जङ्गल, खोला–नाला तथा हिमालहरूमा अन्तर्निहित प्राकृतिक रुपमा सुन्दर नेपाल एक भव्य र विशिष्ट भूमि हो । प्राकृतिक क्षमता, सुन्दरता तथा देशको भौगोलिक लाभांशले गर्दा विश्व मानचित्रमा नेपालको विशेष स्थान छ । राष्ट्रिय मापदण्डअनुसार १८ वर्षदेखि ४० वर्षसम्मको उमेर समूहको रूपमा परिभाषित युवाहरूको जनसङ्ख्या हाल नेपालमा सर्वाधिक रहेको छ ।
व्यापार, व्यवसाय, मानव संसाधन तथा साँस्कृतिक सम्पदाजस्ता महत्व बोकेको कोशी प्रदेशमा पर्ने झापा जिल्ला नेपालको ७७ जिल्लामध्ये एक प्रशासनिक क्षेत्र हो । झापा जिल्लाले स्थानीय विकास र प्रगतिको मूलभावलाई साकार बनाउँदैछ ।
झापाका सबै स्थानीय तह (८ नगरपालिका तथा ७ गाउँपालिकासहित १५ वटा उप–प्रशासनिक क्षेत्रका सबै स्थान)–बाट उर्जाशील युवाहरू २०८० साल जेठ १८ र १९ गते यस ऐतिहासिक नगर युवा सम्मेलनमा एकत्रित भएका थिए । ‘स्थानीय विकासमा युवाको सहभागिता ः नेतृत्व, प्रविधि तथा उद्यमशीलता’ भन्ने राष्ट्रिय नाराबाट प्रेरित यस सम्मेलनले स्थानीय तहको भविष्य निर्धारण गर्न युवाहरूको क्षमतालाई उपयोगी बनाउने लक्ष्य लिएको थियो ।
युवा सशक्तिकरण तथा समावेशी शासनप्रति प्रतिबद्ध रहेको भद्रपुर नगरपालिकाले यस विशेष सम्मेलनको आयोजनाको लागि नेतृत्व गरेको थियो । भद्रपुर नगरपालिकाले युवा–नेता तयार गर्न, उनीहरूलाई प्राविधिक विशिष्टतायुक्त बनाउन तथा उद्यमशीलताको संस्कृतिलाई प्रोत्साहन गर्न अत्यन्त जरुरी रहेको भन्ने विषय पहिचान गर्यो । र, त्यसै सन्दर्भमा स्थानीय विकासको लागि युवा सहभागिता सहयोगी हुने विश्वासले उत्प्रेरित नगर युवा परिषद्ले नगरपालिकाका युवाहरूका दृष्टिकोण तथा आकांक्षाहरूलाई एकसाथ प्रस्फुटन गर्न महत्वपूर्ण भूमिका निर्वाह गरेको छ ।
दूरदर्शी युवाहरूका लागि – अर्थपूर्ण संवादहरूमा सहभागी हुन, विचारहरू आदानप्रदान गर्न तथा नवप्रवर्तनशील समाधानहरूका लागि सहकार्य गर्न, नगर युवा सम्मेलन २०८० बृहद मञ्चको रूपमा प्रस्तुत भएको थियो । यसले युवाहरूको क्षमतालाई परिवर्तनको उत्प्रेरक तथा स्थानीय विकासका साझेदारका रूपमा पहिचान गरेको थियो । नेतृत्व, प्रविधि तथा उद्यमशीलताका स्तम्भहरूमा केन्द्रित भई, भद्रपुर नगरपालिकाको समृद्ध तथा समावेशी भविष्यको स्वरूप तयार गर्न आवश्य साधनहरूका साथ बालबालिकालाई सशक्तिकरण गर्नु सम्मेलनको उद्देश्य थियो ।
यस प्रस्तावनाले नगर युवा सम्मेलन २०८० को युवा घोषणापत्रका लागि मञ्च तयार गरेको छ । यस कार्यक्रमले सामुहिक कार्यको भावनालाई अँगाल्दै निर्णयको प्रक्रियामा युवा समावेशीताको आवश्यकतामा जोड, प्रविधिमा पहँुच तथा उद्यमशीलताका प्रयासहरूलाई समर्थन गर्दछ । यो घोषणपत्र भद्रपुर नगरपालिकाका युवाहरूले उनीहरूको समुदायको विकासमा योगदान दिन गरेको समर्पण तथा प्रतिबद्धताको प्रमाणको रूपमा प्रस्तुत भएको छ ।
भद्रपुर नगरपालिका र नगर युवा परिषद्को आयोजनामा भएको नगर युवा सम्मेलन २०८० मा भद्रपुर नगरपालिकाका मात्र नभई झापा जिल्लालगायत नेपालका विभिन्न क्षेत्रबाट हामी युवा प्रतिनिधि भेला भएका हौँ । नेतृत्व, प्रविधि तथा उद्यमशीलतामा केन्द्रित रही स्थानीय विकासमा युवाको महत्वपूर्ण भूमिका बारे छलफल तथा विचार–विमर्श गर्न हामी एकत्रित भएका हौँ । यो घोषणापत्र हाम्रो उज्वल भविष्यको स्वरूप निर्माण गर्ने तथा अर्थपूर्ण युवा सहभागिता बारे वकालत गर्ने सामुहिक प्रतिबद्धता हो ।
युवाको क्षमता पहिचान गर्न ः
१. युवाले देशको जनसङ्ख्याको महत्वपूर्ण अनुपातको प्रतिनिधित्व गर्छन् र उनीहरूमा अपार क्षमता रचनात्मक उर्जा रहेको हामी स्वीकार गर्दछौँ ।
२. हाम्रो नगरपालिकाको समाजिक, आर्थिक तथा प्राविधिक प्रगति हासिल गर्न युवाहरू महत्वपूर्ण रहेको हामी स्वीकार गर्दछौँ ।
३. दिगो तथा समावेशी स्थानीय विकासका लागि निर्णय प्रक्रिया तथा नीति–निर्माणमा युवा सहभागिता अति आवश्यक रहेको हामीले बुझेका छौँ ।
युवा सशक्तिकरणका लागि नेतृत्व ः
४. युवाहरूको नेतृत्व क्षमताको विकास गर्न, उनीहरूलाई निर्णय प्रक्रियामा संलग्न गराउन तथा स्थानीय शासनमा सक्रिय सहभागी गराउन, पर्याप्त अवसर तथा मञ्चहरू प्रदान गर्न हामी स्थानीय सरकारलाई आह्वान गर्दर्छौँ ।
५.युवा नेताहरूको सशक्तिकरणका लागि सुझाव, मार्गदर्शन तथा क्षमता अभिबृद्धि गर्ने युवामैत्री वातावरण निर्माण गर्न हामी नगरपालिकासम्बद्ध अधिकारीहरूलाई आग्रह गर्दछौँ ।
६. युवतीहरू, सिमान्तकृत समूहहरू तथा फरक क्षमता भएका व्यक्तिहरूका लागि समान अवसर सुनिश्चित गर्दै समावेशी नेतृत्वको आवश्यकतामा हामी जोड दिन चाहन्छौँ ।
युवा विकासका लागि प्रविधिको उपयोग ः
७. युवा सशक्तिकरण तथा सहभागिताको लागि डिजिटल साक्षरता तथा प्रविधिको पहँुच महत्वपूर्ण साधनको रूपमा रहेको हामी प्रकाश पार्न चाहन्छौँ ।
८. झापा जिल्लाका सबै स्थानीय एकाईमा डिजिटल पूर्वाधार विकासको लागि सस्तो र भरपर्दो इन्टरनेट सुविधा पुर्याउनका लागि लगानी गर्नुहुन हामी नगरपालिकालाई आग्रह गर्दछौँ ।
९. कोडिङ, डिजिटल मार्केटिङ तथा अन्य प्रविधिसम्बन्धी सीपहरूको विकास गराई युवाहरूका लागि रोजगारी तथा उद्यमशीलता अभिबृद्धि हुने सीप विकास कार्यक्रमहरू तर्जुमा गर्न हामी स्थानीय सरकार तथा सरोकारवालाहरूलाई आह्वान गर्दछौँ ।
युवा उद्यमशीलताको प्रवद्र्धन ः
१०. स्थानीय आर्थिक विकास एवम् युवाहरूलाई रोजगारीको अवसर सिर्जना गर्न उद्यमशीलताको विशेष महत्व रहेको हामीले बुझेका छौँ ।
११. युवाहरूको नेतृत्वमा रहेका नयाँ तथा साना व्यवसायीहरूलाई सहजीकरण गर्न उद्यम विकास केन्द्र, वित्तमा पहुँच तथा मार्गदर्शनसम्बन्धी कार्यक्रमजस्ता उद्यमशीलता सहयोगी संयन्त्रहरूको स्थापना गर्न हामी नगरपालिकालाई आग्रह गर्दछौँ ।
१२. युवाहरूलाई व्यावसायिक क्षेत्रमा सफल हुन आवश्यक ज्ञान र सीप प्रदान गर्न उद्यमशीलता शिक्षा तथा जनचेतनामूलक कार्यक्रम आवश्यक रहेकोमा हामी जोड दिन चाहन्छ्रौँ ।
युवा विकासका लागि सहकार्यात्मक साझेदारी ः
१३. युवाहरूको विकासका लागि सहयोगी वातावरण प्रोत्साहन गर्न नगरपालिका, निजी क्षेत्र, नागरिक समाजका संस्था तथा शैक्षिक संस्थाहरू बीच वृहत सहकार्य तथा साझेदारीका लागि हामी आह्वान गर्दछौँ ।
१४. युवाहरूलाई प्रत्यक्ष लाभ हुने नीति, कार्यक्रम तथा पहलहरूको खाका तयार गर्दा तथा तिनीहरूको कार्यान्वयन गर्दा युवा संस्था तथा सरोकारवालाहरूलाई संलग्न गराउन हामी स्थानीय सरकारलाई आग्रह गर्दछौँ ।
१५. निर्णय प्रक्रियामा युवाहरुको दिगो संलग्नता तथा प्रतिनिधित्व सुनिश्चित गर्न स्थानीय तहहरूमा इ–लाइब्रेरी, प्राविधिक सहयोग तथा पेशासम्बन्धी परामर्शसहितको परिष्कृत पुस्तकालयद्वारा युवाहरूको विचार, अनुभव तथा ज्ञानलाई सहजीकरण गर्न झापामा एक छुट्टै युवा केन्द्र स्थापना गर्न हामी प्रेरित गर्दछौँ ।
निष्कर्ष ः
भद्रपुर नगरपालिकाका हामी युवा प्रतिनिधि आफ्नो नेतृत्व, प्रविधिप्रेरित कदमहरू तथा उद्यमशील भावनाद्वारा हाम्रो समुदायको विकासका लागि सक्रिय योगदान गर्ने संकल्प गर्दछौँ । सबैका लागि एक जीवन्त, समावेशी तथा दिगो भविष्य निर्माण गर्ने हाम्रो यस यात्रामा हामीलाई सहयोग गर्न र सशक्त बनाउन स्थानीय सरकारमा रहेका हाम्रा जनप्रतिनिधि, सरोकारवाला तथा आम जनसमुदायलाई आग्रह एवम् आह्वान गर्दछौँ ।
