झापा । नेपाली कम्युनिस्ट पार्टी (नेकपा) झापाले भद्रपुर नगरपालिका–२ महारानीचोक निवासी विपन्न महिला इन्द्रमाया खातीका लागि तीनकोठे घर निर्माण गरी हस्तान्तरण गरेको छ ।
जिल्लाका १५ वटै स्थानीय तहमा विपन्न नागरिकका लागि घर निर्माण गर्ने अभियानअन्तर्गत नेकपाले इन्द्रमायाको घर निर्माण गरेको हो । आज आयोजित घर हस्तान्तरण कार्यक्रममा नेकपा कोशी प्रदेश संसदीय दलका नेता इन्द्र आङ्बोले इन्द्रमायालाई घरको चाबी हस्तान्तरण गरे ।
कार्यक्रमलाई सम्बोधन गर्दै प्रमुख अतिथि आङ्बोले संविधान निर्माणका क्रममा आवासको अधिकारलाई मौलिक हकका रूपमा समावेश गरिएको बताउँदैकम्युनिस्ट सरकार भएका बेला विपन्न तथा सुरक्षित आवास कार्यक्रम सञ्चालन गरिए पनि राजनीतिक अस्थिरताका कारण त्यसलाई पूर्ण रूपमा अघि बढाउन नसकिएको उल्लेख गरे । उनले झापामा पार्टीले निर्माण गरेको घरले राज्यलाई घचघच्याउँदै विपन्न नागरिकको आवासको अधिकारप्रति ध्यानाकर्षण गराउने काम गरेको पनि बताए । नागरिकका आधारभूत अधिकार तथा आवश्यकतालाई राज्यले सम्बोधन गर्नुपर्नेमा जोड दिँदै आङ्बोले घर निर्माण अभियानले मुलुकलाई समाजवादउन्मुख बनाउन दबाब सिर्जना गर्ने बताए । उनले अभियानमा सहभागी सबैलाई धन्यवाद पनि दिए ।
कार्यक्रमका विशेष अतिथि नेकपाका केन्द्रीय प्रचार विभाग उपप्रमुख अशेष घिमिरेले घर निर्माण कार्यले सांकेतिक रूपमा भए पनि झापाबाट समाजवादी अभियानलाई विस्तार गर्ने काम गरेको बताए । मानिसले बाँच्न पाउने अधिकारसँगै सुरक्षित आवासको अधिकार सुनिश्चित गर्ने पक्षमा पार्टी सधैँ अग्रपंक्तिमा रहेको सन्देश यस अभियानले दिएको उनको भनाइ छ ।
कार्यक्रममा घर निर्माणमा सहयोग गर्ने विभिन्न दातालाई सम्मानसमेत गरिएको छ । विभिन्न दाताबाट संकलित ३ लाख ८१ हजार रुपैयाँको लागतमा भान्सासहित तीनकोठे घर निर्माण गरिएको नेकपाका केन्द्रीय सदस्य तथा घर निर्माण संयोजक बासु दुलालले जानकारी दिए । नेकपाले झापाका १५ वटै स्थानीय तहमा विपन्न नागरिकका लागि घर निर्माण गर्ने अभियान अघि बढाएको बताउँदै उनले दोस्रो घर निर्माणका लागि लाभग्राहीसमेत छनोट भइसकेको जानकारी दिए ।
जिल्ला कमिटीबाट निर्णय गराएर घर निर्माण अभियानलाई थप व्यवस्थित गर्दै लगिने उनको भनाइ छ । पार्टीभन्दा बाहिरबाट सहयोग संकलन नगर्ने नीतिअनुसार पार्टी सदस्यबाटै रकम संकलन गरी घर निर्माण अभियानलाई निरन्तरता दिइने उनले बताए ।
घर निर्माणका लागि बासुदेव दुलाल, तारा दुलाल, ईश्वरी दाहाल, पदम लिम्बू, ओमसाई पाथिभरा हस्पिटलको फार्मेसी, डा. मुरलीप्रसाद साह, श्रीप्रसाद मिश्र, सानुकुमार लामा, चन्द्रा श्रेष्ठ, बीपी भट्टराई, जोया सुब्बा, राम पोखरेल, परशुराम शंकर, कृष्ण कौशल, नाजिर हुसेनलगायतले नगद तथा जिन्सी सहयोग गरेका छन् ।
घर निर्माण संयोजक बासु दुलालको अध्यक्षतामा भएको कार्यक्रममा नेकपा नेता पदम लिम्बूले स्वागत गरेका थिए भने कार्यक्रमको सञ्चालन पार्टीका जिल्ला सहसंयोजक बीपी भट्टराईले गरेका थिए ।
कार्यक्रममा नेकपा केन्द्रीय सदस्य चन्द्रा श्रेष्ठ, डिल्लीराम घिमिरे ‘हिक्मत’, पार्टीका जिल्ला संयोजक खड्क तिम्सिना ‘पवन’ लगायतका नेता–कार्यकर्ताहरूको बाक्लो उपस्थिति थियो ।
