नेपालकै अग्रणी सहकारी संस्था, झापाको विर्तामोड २, चारपानेस्थित सहारा वचत तथा ऋण सहकारी संस्थाले २८ औँ स्थापना दिवसको अवसर पारेर हाफ म्याराथन प्रतियोगिता आयोजना गर्ने भएको छ ।
संस्थाको स्थापना दिवस यही चैत २१ गते पर्ने र सोही दिन २१.०९ किलोमिटर दूरीको खुला हाफ म्याराथन हुन लागेको आज पत्रकार सम्मेलन गरेर जानकारी दिइएको हो ।
झापा जिल्ला खेलकुद विकास समितिको समन्वयमा संस्थाको अतिरिक्त क्रियाकलाप उपसमितिले प्रतियोगिता आयोजना गरेको हो । खुला हाफ म्याराथन प्रतियोगितामा देशभरिका खेलाडीले सहभागिता जनाउन पाउनेछन् । आर्थिक, शैक्षिक, स्वास्थ्यसँगै खेलकुदलाई पनि प्रोत्साहन गर्ने उद्देश्यले म्याराथन आयोजना गरिएको संयोजक भेषराज भण्डारीले जानकारी दिए ।
संस्थाको केन्द्रीय कार्यालयबाट सुरु भएको प्रतियोगिता चारपानेचोक–प्रभुचोक–सांगवेद स्कुल–ओमचोक–कुशलचोक–अर्जुनधाराधाम–वरपीपलचोक–मिलडाँडा–प्रगतिटोल–भाङबारी–तामाङचोक–रातेखाल–बिरिङ खोलाको कज्वे–पानीकल–लक्ष्मीपुर हुँदै सहारा साकोस शिक्षा सदनमा पुगेर सम्पन्न हुने झापा जिल्ला खेलकुद विकास समितिका एथलेटिक्स प्रशिक्षक गोपाल गादवले जानकारी दिए । प्रतियोसगतामा जिल्ला खेलकुद विकास समितिले प्राविधिक सहयोग पुर्याउने छ भने सुरक्षा निकायहरुले ट्राफिक व्यवस्थापन तथा सुरक्षा व्यवस्थापनमा सहयोग पुर्याउने बताइएको छ ।
