ब्राउनसुगरसहित दुईजना मेची पूलबाट पक्राउ

भद्रपुर । स्कुटरको भाइजरभित्र लागुऔषध ब्राउनसुगर ल्याउन खोजेका दुईजनालाई प्रहरीले पक्राउ गरेको छ ।
जिल्ला प्रहरी कार्यालय झापाका अनुसार स्कुटर चालक शिवसताक्षी नगरपालिका– १ निवासी २४ वर्षीय प्रजन्त राई र सोही स्कुटरको पछाडि सवार बाँके नेपालगञ्ज उपमहानगरपालिका ६ घर भई हाल बिर्तामोड नगरपालिका– १ मा डेरा गरी बस्ने २१ वर्षीय सोहन भडेललाई ब्राउनसुगरसहित हिजो साँझ पक्राउ गरिएको हो ।
इलाका प्रहरी कार्यालय र लागुऔषध नियन्त्रण ब्युरो काँकरभिट्टाबाट खटिएको संयुक्त टोलीले मेचीनगर– ६ स्थित पुरानो मेची पूलमा भारतबाट नेपालतर्फ आउँदै गरेको मे १० प ३८०७ नम्बरको स्कुटरमा सवार उनीहरूलाई शङ्का लागी चेकजाँच गर्दा ४ ग्राम ब्राउनसुगर फेला परेको थियो । उनीहरूले स्कुटरको भाइजरभित्र लुकाएर ब्राउनसुगर ल्याएका थिए । पक्राउ परेका दुवैजनालाई इलाका प्रहरी कार्यालय काँकरभिट्टामा राखेर थप अनुसन्धान भइरहेको डीएसपी खगेन्द्रप्रसाद रिजालले जानकारी दिनुभयो ।